2Cor 2 | AOJFILIFITA | STEP | Okom aeꞋanai aꞋiam endilisi naꞋama aꞋi, aeꞋ ina ataꞋ etanima efeꞋmago ipeꞋ wapotiꞋ endaꞋ opalef ipeꞋimi nimanim, owaꞋ.

2 Corinthians 2

1 Okom aeꞋanai aꞋiam endilisi naꞋama aꞋi, aeꞋ ina ataꞋ etanima efeꞋmago ipeꞋ wapotiꞋ endaꞋ opalef ipeꞋimi nimanim, owaꞋ. 2 IꞋi endaꞋ opalef ipeꞋimi nimanim, emi egafis sondaꞋe endanifel? OwaꞋetin. IpeꞋ etipa, eaꞋ andaꞋ ukup ipeꞋimi aom. 3 IꞋi ipeꞋ pendanifel, andeandeꞋ. Waf anama buꞋunai. EaꞋ iꞋi aeꞋ efoꞋo ma pendaꞋ opaf aeꞋanai nimanina, naꞋama andaiwaꞋ. EaꞋ amama atom fowaꞋ aliꞋ andaꞋ basef amama mafeꞋmago ipeꞋ. DeiꞋ main, aeꞋ egawa ipeꞋ endilisi naꞋama. IꞋi aeꞋ endanifel epe, ipeꞋ hipei wapotiꞋ pendanifel. 4 Endilisi andaꞋmepago basef amama ma nemaf anama opaf aeꞋanai ameꞋ nimanimi luꞋwami eaꞋ alef hihif. AeꞋ ina andaꞋ basef amama ma meseꞋepa opalef nimanim, owaꞋ. AndaꞋama ipeꞋ pegawa aeꞋ okom nainailipa endilisi.

Esis sokwaha waf aonai anona owalomas nandaꞋmasanai

5 IꞋi enin epen ofagena nendaꞋ opaf nimaninai netaga, enin ina nandaꞋ opaf aeꞋanai atona nimanina, owaꞋ. Enin nandaꞋ ipeꞋ hipei opalef nimanim wapotiꞋ. AeꞋ aꞋi basefa ipeꞋ hipei eaꞋ enipa owaꞋ. Ina aꞋipipa. AndaiwaꞋ ma iꞋi basef laꞋifimi endilisi ma waf aonai anan nandaꞋanai, owaꞋ. Amama atom deiꞋ aꞋiam naꞋama ma enipa owaꞋ. 6 Nimanimi ipeꞋ epes hipei peseꞋanami eaꞋ mandahama anan. 7 EaꞋ deiꞋ pendaꞋ anona wafa anan. AndeandeꞋma pekwaha waf aonai ananinai pigiambamana notaga laꞋifina pendaꞋ opaf ananinai awanena. NaꞋama nimanimi luꞋwami endilisi mondaꞋ okom ananinai aona eaꞋ nokwaha Dembinai. 8 Amama atom deiꞋ aꞋipipa basef laꞋifimi pihiꞋamba anan ipeꞋ ukup maimailana. 9 FowaꞋ andaꞋ basef amama mail okwatip aꞋipipago ma egawa waf ipeꞋinai. AndaꞋam naꞋama aꞋi egawa ipeꞋ paila basef aeꞋami laꞋilaꞋef o owaꞋ? 10 IꞋi ipeꞋ pekwaha waf aonai enin epen nandaꞋanai, endilisi aeꞋ wapotiꞋ ekwahomanana. Waf anama aonai akwahanai okom aeꞋanai naꞋi naꞋama. AeꞋ ina egawa okom Kraisi naꞋi naꞋimama, eaꞋ iꞋi andeandeꞋma aeꞋ ekwahomanana naep Kraisi, ekwahomanana endilisi ma igiambamepa pepe andeandeꞋ. 11 AeꞋ andaꞋam naꞋama ma Satan ina anona nemaf nombasoꞋmapa nikilaꞋapa, owaꞋ. DeiꞋ main, afaꞋ ogawa okom ananinai nambasoꞋami.

Pol opaf nimanina wambel anama Troas

12 FowaꞋ Dembinai nandaꞋ eaf nafeꞋ aeꞋ afeꞋ ataga wambel Troasa awalapa basef buꞋwami Kraisi. 13 EaꞋ opaf aeꞋanai ina nape awanena, owaꞋ. DeiꞋ main, aeꞋ ina ataꞋ ati owalome aeꞋanai Taitus, owaꞋ. EaꞋ akwaha esis Troas afiꞋi ataga anona etap hiagoma Masedonia.

Pepel Godi atona amam aposel maliꞋamona wandafa waf aonai

14 EaꞋ deiꞋ afaꞋ wanifela God. Anan laꞋelaꞋef nagiambamafa wape laꞋififa waloma Krais eaꞋ waliꞋamona wandafa waf aonai. Ama maol afaꞋinai God nawalapa basef eaꞋ enis epes sogawa basef Kraisi. Gawa anama anan siꞋi alogw buꞋwami ma mafeꞋagon hiagoma. 15 Endilisi afaꞋ siꞋi alogw buꞋwami ma mataga Krais mafeꞋma God. Alogw amama mafeꞋ laꞋafena epes isima deiꞋ God nakwahomas waf aonai nofaꞋas sotanimani, isima sape eaf nafeꞋ heveni saloma isima sape eaf higililasanai wapotiꞋ. 16 Ama wambota anama epes sape eaf higililasanai, alogw amama hiꞋapimi siꞋi sagaꞋi. EaꞋ wambota anama sape eaf nafeꞋ heveni, alogw amama buꞋwami maseꞋas ambal namunai. EaꞋ deiꞋ afaꞋ ukup maꞋi maol anama Godi waꞋi ina enis epes laꞋifisa ondaꞋana, owaꞋ. EaꞋ afaꞋ laꞋififa wandaꞋana. 17 DeiꞋ main, afaꞋ ina siꞋi enis epes hiesi safeꞋagon hiꞋalagona sandaꞋ maola basef Godi ma sofaꞋ amamaga asasimi atom, owaꞋ. AfaꞋ wandaꞋ maol anama Godi naꞋama. AfaꞋ ina wambasoꞋam etina maol Godi, owaꞋ. AfaꞋ wandaꞋam waila eaf buꞋunai atona hiꞋalana, wape laꞋififa waloma Krais. God nasapaꞋafa wafiꞋi wawalapa basef mafeꞋ andeandeꞋma naep ananimi.